Zer da MapaZentzuz
MapaZentzuz tresna praktiko eta erabilterraza izatea nahi dugu, bere kontsumoak izan dezakeen eraginagatik kezkatuta dauden Gasteizko pertsonentzat. Izan ere, kontsumo arduratsuago baten bidez tokiko ekonomia indartu dezakegu, giza eskubideak errespetatzen dituztenen eta ingurumenarekiko errespetua bermatzen dutenen alde eginez.
Mapa honetan, kontsumo arduratsuarekin konprometituta dauden eta, gutxienez, MapaZentzuzen irizpideetako bat (azpian ikusi ditzakezu) betetzen duten saltoki txikiak, zerbitzu-enpresak, azokak edo elkarteak jasotzen dira. Zure establezimendua horietako bat izan daitekeela uste baduzu eta MapaZentzuz-en parte izan nahi baduzu, jar zaitez gurekin harremanetan.
Irizpideak
Saltoki honek tokiko eragileek ekoiztu, banatu eta saldutako produktuak eskaintzen ditu. Honek komunitatearen garapenari eta ekoizle eta kontsumitzaileen arteko konfiantza eta gertutasun harremanak sortzeari laguntzen dio. Gainera, tokiko nekazaritza, abeltzaintza eta artisautzaren garapena sustatzen du, eta salgaien garraioaren eragina eta negutegien eta hozkailuen gehiegizko erabilera murriztu.
Ekoizpen-prozesu sostengarrien bitartez gauzatzen diren produktuak edo zerbitzuak, ingurumena eta naturaren zikloak errespetatuz eta pertsonentzako osasungarriak diren produktu edo zerbitzuak sortuz.
Hondakinik onena, sortzen ez dena. Saltoki hauetan, erabili eta botatzeko ontzien eta produktuen kontsumoa murriztu dezakezu, ontziratu gabeko erosketaren edo jasangarriagoak edota berrerabilgarriak diren produktuen alde eginez.
Hegoaldeko ekoizle-komunitateetatik datozen produktuak, bidezkoak diren baldintzetan eta gizarte-, lan- eta ingurumen-eskubideak errespetatuz ekoiztu direnak. Horrela, nazioarteko eta tokiko merkataritzan ekitate handiagoa lortu nahi da, herrien garapen global jasangarriaren eta pobreziaren zein desberdintasunaren aurkako borrokaren alde eginez.
Produktuak berriz erabiltzeko edota beraien bizitza erabilgarria luzatzeko aukera eskaintzen duten dendak eta zerbitzuak, bigarren eskuaren, konponketaren eta birziklapenaren sustapenetik. Horrela, gure kontsumoa eta ingurumen-inpaktua murrizten ditugu.
Emakumeek edo heteronormatiboak ez diren pertsonek bultzatzen dituzten ekimenak, dendak eta zerbitzuak ikusarazi nahi ditugu, eta kontzienteki genero-identitate, genero-adierazpen edo sexu-orientazioagatiko desberdintasuna murrizteko neurriak eta praktikak garatzen dituztenak.
Ekonomia helburu bezala ez, baina pertsonen eta haien ingurunearen ongizaterako bitarteko bezala aldarrikatzen duten ekimenak, dendak eta zerbitzuak. Printzipio hauek ditu: ekitatea, lana, ingurugiro jasangarritasuna, lankidetza, inguruarekiko konpromisoa eta irabazi-asmorik gabekoa izatea.
